Yon peyi ki chaje ak problèm
Nan yon sèl ane li sipote tout kalite doulè
12 janvye se te tranbleman de tè
Kounye a kolera frape, tout moun pè
Pou tikrik tikrak li voye w anba tè
Li pa respekte pastè ni pè.

Kolera se yon bagay ki di
Lè l pran w li fè w vomi
Ou ka gen dyare koulè dlo diri
Si w pa mache prese ou ka mouri
Pou evite kolera, yo di w bwè dlo bouyi
Ayiti vin tounen yon gren banann mi.

Chak sa ki vini yo ba n kout ba
Yon peyi ki chaje ak leta
Ou pa janm tande diskou yon kandida
Nan tan lontan se te sida
Kounye a se kesyon kolera
Depi l pran w li lage w sou bounda

Ayiti an danje
Tout moun ap mande sa sa ye
Yon peyi ki pa menm gen inite
Timoun yo pa ka manje
Kounye a nap resevwa dyare
Si n pa rele Bondye konnen nou antrave


Mezanmi ki kote sa prale
Nan tout ti kwen pase tout moun se dlo nan je
Apre tranbleman de tè 12 janvye
Granmoun kou timoun ap kriye
Akoz fanmi ak zanmi yo ki ale

Kolera se yon maladi
Ki fè fanmi fremi
Lè n gade timoun ak granmoun kap vomi
M rele O! Bondye kòt sa soti
Dèfwa m rete m ta vle pati
Lè m wè frè m ak sè m kap soufri

Maladi sa se telman frekan
Si w pa prese li ba w katrè d tan
Li genyen yon sèl slogan
An verite nou tout ka pran l
Fò n lave men’n detanzantan
Pou n pa tonbe anba mechan

Kolera sa fè tout moun kalkilè
Si tou lè n wè yon gen dyare
Lèsansyèl se pou n reyidrate
Se pa chita plede pale
Nou sipote toujou priye
Pou kolera pa pote’n ale!!!


Pitye pou Ayiti
Gade jan Ayiti trennen lan labou

Anba men yon kolonn lougarou

Yo pito kite peyi a nan grangou

Pou yo fè politik toupatou

Ayiti tounen yon tanbou

Chak sa ki vini yo fè yon kou.

Yon peyi ap depafini

Timoun kou granmoun ap soufri

Yo pa menm panse ak avni

Demen yo ka nan kouri

Genyen kap dòmi nan lari

Pou tan yo bezwen yon abri

Menm si nou se nèg nwè

Sa pa vle di nou pa gen valè

Pa okipe moun k’ap ban revolvè

Pou ka al volè

Demen pou ka al nan lanfè
Libète, egalite, fratènite

Libète, Egalite, Fratènite

Pouki nan tout peyi k’egzizte

Se nou kan mal propete.

Yo di tout bouch fann pou manje.

Mwen menm fanm si m pa bwase lavi m pap jwenn

Soupe pouki se konsalye

Yo prann pou Bèt

Yo ba nou nen pòl kou Frèt

Eske se pask nou pa anafabèt

Ou Byen n pa gen Bon zasèt.

Nan peyi’m

lè se pa koudeta k frape

se dlo k’met pye

lè se peyi’m ki tranble

se kolera kantre

Oo, oo, men pouki aprè desan zan libète

Anyen serye pa janm regle

Nou menm, fanm Pòtoprens ak fanm provens

Nou gen dwa tankou tout moun pou n di
Nan Egalite.

Peyizan. Atizan.

Doktè. Voudouizan.

Pastè. Travayè.

Ak tout lòt yo.

Ann fè fratènite

Pou n di Repiblik DHaiti


Ayiti
Ayiti bèl peyi kap soufri
Bèl flè kap mal nouri
Peyi ki pa gen lavi
Sitou pou sila kap vini.

Ayiti ki te si bèl
Ki te gen yon bote reyèl
Ou te ka konpare l ak lakansyèl
Kounye a pou viv ladan l se mare fyèl
Bote Ayiti a dekale
Tout moun rete bwa kwaze
Bouch pe pèsòn pa vle pale

Ayiti tankou yon pikèt yo plante
Nan mitan yon ma labou
Yo tann yon po bèf sou li
Solèy la pli pase sou li
Ayiti ki te la bèl dèzanti
Kounye a ki tounen poubèl ki pi santi.

Lamizè nan peyi’m pa la pli
Li pap janm aveti’w lè lap vini
Mm, mm, mm.

Haiti
Haiti lontan ou te bèl pase lalin ak solèy
tout moun rèv yo se pou yo te genyen w nan de pla men yo paske pat gen tankou w bèl fanm sa
kounye ya tout moun ki bezwen imilye
se ou menm yo pase w anba pla pye
yo trete w pi mal pase fatra
O Haiti ki lè wa chache eskanp figi ou te genyen anvan
ki lè tout pitit ou yo ap sispan pran imilyasyon nan men pwoch antoure l yo
si nou yon ta rive konprann lòt nou ta reyalize rèv nou
soufrans nou yo ak kalamite nou yo
ta amelyore peyi nou
ta rive jwen yon espwa pou sak ap vini dèye yo
men kem ta mouri foumi ta vin pòt nouvèl ban mwen
Haiti fok soufrans ou fini yon lè paske ou pap fin deperi wap leve kanpe.
Kanpe byen w ak tout fyète w.
Haiti.

Impressum

Tag der Veröffentlichung: 23.12.2010

Alle Rechte vorbehalten