Beim Gigara

Letztns woa i beim Gigara um an Leberkas und do woa a oids Muatal vua mia, und wias bei de Oidn hoid so is brauchns a Wäu bis eana Klagöd aussazöht ham.
I woa scho a wengal knapp mit da Zeit. Mit ihre boa Netsch hats umadumdau, und passt hots oiweu no ned, bis ma da Geduidsfodn grissn ist und i zu ia g’sagt hab, ob i ia ned höf‘n kau. Scho woit i zu ian Gödbeidl greifen, do hauts ma mit ihra Kruckn ane auf’d Klebeln…
Ma soit goaned glauben wia schnö de de in da Pratzn g’hobt hot!


Aufg’hoidn wuan

Foah i grad vum Greißla ham, hoit mi a Kiwara auf. Glotzt in mein Deckl, draht a Runde um mei Kraxn und scheanglt auf meine Gummi. Soweid hät’s jo eh passt.
Nua weu hint’n am Bankl zwa laare Sechzehnablech aus mein Mistsackl ausse g’flogn san, weg’n dem woit a justament wiss’n ob i was g’soffn hob. I heds eh zeascht daunehaun woin, nua woa vua de Mistkiwin ka Sattl frei.
Ea hätt woin dass i ins Reahl blos.
Owa wia i eam dazöd hab, dass i no ned blos‘n hob, hot a nua gmaant, dass a des kana Oidn o‘nimmt…


Beim Glatznscheera

Sitz i beim Glatznscheera, lahnt so a aufdacklte Prodafee duat.
Wias endlich drau woa, stoiziats wia a Pfau zum Sessl , de Nas’n obn, grad dass ned eineregnt. Sie wü de Frisua so wia am Büdl. I hab‘s beowacht wia sa se in Spiagl schaut und den Schädl hin und hea draht hot, tschikt hots ane noch da aundan.
Wias featig woa hots mit den Glatznscheera audraht, weu‘s ned so wuan is wia auf dem Büdl und dea hot ia eired’n woin, dass ka Puppal mea is, mea hot a ned braucht…
A oids G’fries kann a da Glatznscheera ned ändan.

Impressum

Tag der Veröffentlichung: 01.03.2010

Alle Rechte vorbehalten