WIENERISCHES


Mei Wiaschtlstandl

Seit Joahr und Tog
hob i mein fixn Wiaschtlstaund
und zwamoi in da Wochn
bin i a durt
De Wurscht is frisch
de Semmln san knackig
und es Bier is richtig pflegt -
aus da Floschn
Hinta da Budl
steht a ehemoliga Rapidla
da Stefan
und der hod si´s gestan
so mit mia vascherzt
dass i glaub
i muass mi um an aundan
Wiaschtlstaund umschaun

„A jedar a Oasch“, mant a, da Stefan
„der im Lebn zwamoi
in gleichn Fölla mocht
und noamol heirat
I bin a gschiedn
oba i tat mei jetzige Oide
ni mea heiratn
a waun ma jetz boid 15 Joahr z´samm san
Sowos mocht nur a ausgmochta Depp!“

De drei Saufbriada
jeda mit an Ochtl in da Haund
gem eahm recht
und der ane von da Bank
der si grod a Haasse
ois Mittogessn einedruckt
nickt oiwissend und obagscheit
Und wia se de olle dann
nach ana Stund oda so
vazupft haum
und i mei drittes Bia bei eahm bestö
man i so gaunz nembei

„Waasst eh, Stefan
dass i im Summa
in Las Vegas g´heirad hab?
S´zweite Moi!“

„Oijeeh, des hob i ned g´wusst
oba des hob i vurhin eh
goar ned so gmaant
weu bei an Intelligenzla
wia bei dia
do güt des gaunze ja goar net
waast ehh!
Oba, darzöh
wia woars in JU ESS E?“

Und dann darzöhl i eahm
de gaunze G´schicht
von da Elvis Bresli-Kappön
vom fuffzehn Meta laungan Kadillack
mit´n livrierten Schoffear
der uns zum Friednsrichta gfiat hot
wia i auf Enlisch ´jo´ sogn hob miassn
wo i do ka Wurt davo varsteh
von dem Video, des draht haum
de Hochzeitsbüda, des gschossn haum
von da Hochzeitsswit im 28. Stock
im Flamingo-Hülten-Hotö
A in Strip, de Casinos
und in Flug iban Canijon
wo untn de Hopi-Indiana lebn
loss i net aus

Daun zag i eahm no a Büdl
aus meiner Briaftoschn
wia i lessig beim Rulett steh
und grod de buntn Schetons einstraff -
Des gibt eahm in Rest

„Jetzt sog ma nur no
wo´s des ganze bucht host
und wos´d dafia oglegt host!“
„Hearst Oida, i hob glaubt
nur Deppate heiratn a zweits Moi?“

„Aber des iss do gaunz wos aundas!
Waun ma dir a so zuahert
muass des jo a Waunsinn gwesn sei!“

I gib eahm de Adress von da Klanan im Reisbüro
und nimm ma vua
dass i mei Wiaschtlstandl
do net so schnö wechsln wea


F d H

S´geht ma jo scho füh bessa
gsundheitlich man i
mit meina Leba
der Goi
de wos ma aussegschnittn haum
und übahaupt
Nur da Darm
dea mocht ma no Surgn
maunchmoi

Montog erscht wieda woars soweit
Zerscht vartrog i a poar Wochn laung oiss:
Schnitzl, Bier, Wei
sogoa ob und zua an Schnops am Obend

Oba dann hob i wieda so a Zeit
do kraumpfts mi zsamm
do kriag i ka Luft
da is de Waumpn aufblaaht
und mir tuat rund um adum ollas weh
Und daunn geh i zum Dokta
So wia leztn Dienstog

Wia i scho auleitn wü
siech i an bleigschriebanan Zettl an seina Tia
„Wegen Todesfall geschlossen“
und a Nochbarin geht zuaföllig a grod voabei

„Wer issn leicht gschturbn?“
frog i de Oide so im Vorbeigeh

„Da Dokta söba, stöhns ihna vua!“
Und da hots ma wirkli an Ruck gebn
Er woar immer so nett und leiwand zu mir
Nur a poar Joahr öde ois i
woar a - a bissl a Blader - so wia i
hot hoid gern gessn
und trunkn wohrscheinlich a
Er hot ma sogoar seine eiganan Puiva vaschriebn
waun i mein Darm wieda amoi
z´stoark aungfüht ghobt hob

„Mitn Herzn soiss eahm dawischt haum“
mahnt de Oide no im Weidagehn
„er woar hoit a bissal übagwichtig
unsa Herr Dokta, gölns?“

I schau no amoi auf den Zettl
daunn drah i mi um
weu i waas, dass i heit nimma zu eahm
in de Sprechstund kaun
heit ned und übahaupt nimma mehr

Oba ans hot a ma sogor ois a Toda
wia i so vur seine Tia mit´n Zettl gstaundn bin
no vaschriebn:

Ohnehma!
I haummas gschwurn
i sauf kan Alkohoi meah
und friss nua meah de Höfte
weui sonst triff i eahm vielleicht no friah
ois wos ma recht iss


Mei erschte Wernnisasch

De hob i jez a hinta mia
mei erschte Wernnisasch
In an Puff hob is gmocht
und es san natürli kane Leit kumma
oba dafia haum ma beim Büdaaufhänga
olle Huan zuagschaut
und des woa a net schlecht
so haumma olle wos dafau ghobt
d´ Huan haum wida amoi Kunst gsegn
und i hau ma wida amoi
Huan aus de Nehe auschaun kenna


´s Hunderl

Laung hob i mi erfoigreich gwehrt
oba jez iss soweit:
seit gestarn haum ma so an klan Rattla daham
weiß schwoaz mit launge Uahn und ana rotn Zungan
von der eahm s´Wossa oiweul oberinnt
aufn Tebich

Ausn Tierheim haums eahm g´hoid
I wor ned mit
weu i bin gegn a jeds Viech in da Stod
und erscht bei uns in da Waunung
Oba weu i jez in d´Rentn geh
haums glaubt, se miassn ma a Freid
mit sowos mochn - Najo!

Auf jedn Foi hob i jetz imma
a guade Ausred
waun i wegn mein Durchfoi
ned gschwind gnua aufs Heisl kumm
„Da klane Trottlhund woars“
kaun i daunn imma sogn
Und wer wird scho meine
von da Hundescheiße ausanaunda kenna!


Südseitig

I hob eahm eh ni so richtig megn
mein strengan Vodan
der mi bei jeda Gelegnheit obegmocht hot
Oba wir a si daunn
so um de fuffzig
sei eiganes Grob aussuachn gaunga is
do hob i gwusst
jetz is a gaunz deppat wurn

„Auf an Haung wüll i amoi liegn - südseitig
leicht im Schodn mitn Blick über Wean!“

Mia haum eahm ausglocht
und ned gaunz eanst gnumma
oba er hot net locka lossn

Und heit liegt a scho boid fuffzehn Joahr
aufn Oberlaaer Friedhof
und ihr weard sas ned glaubn:
Von sein Grob siacht ma an an kloarn Tog
über gaunz Wearn bis obe zum Schneeberg
und zua Rax
Und er liegt fraunk
südseitig!


´s Spoarbuach

Wie mei oide Nochbarin imma öda wurn is
sand imma mehr von ihre Vawaundtn
und Bekaunntn wegagsturbn
und de wos übabliebn san
mit de hot sa si zastrittn

Und s´iss soweit kumma
daß sa si laungsaum Surgn gmocht hot
wem´s amoi ihr gaunzes Daspoartes -
sie woa a hechare Beaumte ohne Mau
und kane Kinda und nix - vamochn soll

Und wias mit iah daun z´End gaunga is
hot s´mi ins Spitoi gruafn und hot gmant:
„Fini“, hot´s zu mia g´sogt, „i hob ma´s
gaunze Leben net vü g´leist und hob brav g´spoat
und so iss gaunz sche wos z´saummkumma
I hob kane Kinda und a ka richtige Freindin
oba in Nero, mein klan Dackl, hob i no
Er is seit i do bin bei da Zwerschina im erstn Stock
de kümmat si um eahm
Und do gib i da jetzt mei Spoarbiachl
do iss mei gaunzes Göld drinnan
fost zwahundattausnd Schülling
Des gibst in Nero, mein Hund
I hob eahm in de letztn Joahr ogricht
er kaun mit´n Biachl auf de Bank ummerenna
und si söba a Göld ohebn
Und einkaufn geh kaunn a ah
I wüh, daß d´eahm heite
waunns´d hamkummst
glei des Spoarbuach do gibst!“
Damit zahts a blaues Biachl von da Erschtn
untan Kopfboista vira
druckt mas in d´Haund
mocht no an Schnaufa
foilt zruck und is wecka

Und ihr weard´sas ned glauben
Da Hund rennt seither reglmäßig umma
zu da Erschtn, hebt si a Göld o
und geht dann fost jedn Tog eikaufn

Und er z´reissat an jeden
der eahm des Biachl weckanehma mechat


Waun i so vur mi dahinspinn ...

... daun denk i ma, daß eahm scho a schene Leich
mochn wearn, dem Benka
der wos si unlängst daschossn hot
mittn in da Nocht in sein Büro

Oba vurher hot er no a Bombn zindn woin
de was de ganze Politik häd in d Luft sprenga soin
mit Beweismatearial und Brotokolle
ausm Gedächnis, hot a glaubt
Mit Nauman drin, de so weit obn san
daß ma sis jo übahaupt goa net vuastön kau

Bis in d'Regierung auffe hot de Zindschnua greicht
daunn hot a den gaunzn Motschka no söba
am Westbaunhof aufgebn: a bor Untalogn fia de Krone
fian Kuriar, in Standad, in ORF und no a boa aundare
Und natirle a an de Opposizionsbadein
Daun issa zruck ins Büro, ziagt de Buffn ausm Ladl
hoit sis an de Schläfn und druckt o - pennk!

A hoibe Stund späda find daham sei Oide
a an Obschidsbriaf, ruaft sofurt im Aumt au
da Portier rennt auffe und findt eahm
oba es iss scho zspät

Und jetzt wü kana wos davo gwusst haum
Ned amoi a Vamutung!
De letzdn Gespräche locka, freindlich, offn
wias hoid is unta dPolitika

Oba des Material, wos a no vuaher in Umlauf brocht hot, des iss ka Dreck net!
Postenschacha, Steiahintaziehung, Parteinfinanzierung
und no a Hauffn Rechte, de´s nua
fia de Oban Zehntausnd gibt, kumman ausse

Und alle, de wos a naumendlich nennt
dementirn sofurt, san gaunz perplex
und tan total erschittat
Vom Druck iss de Red, von da Zeit
wia da Tode söba ibert Patei wos wurn iss
wia sche a net eh vadient hat und a weida häd kenna
waun a si hoid ned in an Moment da geistigen Vawirrung
de Kugl gebn häd
A Lebn häd a no haum kenna, wias Müllionen in
unsan Laund nie wern kriagn
Und a zweite jingare Frau hod a ghobt
a Medizinarin und a Villa um fuffzehn Mille
hod a si hinstön lossn

Oiso, wos woits. Do hots nie an Druck gebn
weder von dera Bank no von ana aundan
und scho übahaupt ned
von irgend an Politika, Minista oda goa vom ... na!

Waun ma jetz enga zsaummruckn und olle
de Pappn hoidn und wauns umbedingt sei muass
imma sGegnteu behauptn
Genossn, werds segn, daun kaun uns
kana wos nochweisn

S anziche wos da Stoot in so an Foi duan kau, iss
daß ma eahm fia seine Vadienste an da Rebublik eahn
dass ma olle a Weu hoid a wengal bedroffn tuan wern
und villeicht losst si wos mit ana schenan Leich mochn
Ma wiad jo segn.

Und denkst imma drau: de nechstn Woin kumman
gaunz bestimmt!


Da Sisyphos

Ihr kennts de Gschicht vom oidn Sisyphos eh
Oba jo, der wos de Götta vaergat hot
und dafia haums eham an Fölsbrockn einedruckt
den muaß a jetzt bis in olle Ewichkeit
an Haung aufferoin
und waun a obn is
daunn kummt a eahm wieda aus
roit in Berg wieda obe
und des gaunze faungt von vuarn wieda au

Jetzt denkts sicha: A fuachtbore Strof
fiarn orman Sisyphos
Der muaß jo laungsaum deppat wern dabei
waun as net eh scho is!

Foisch, sog i eich!
Kloa, daß eahm net guat geht
waun a ollaweu den schwarn Brockn auffewuchtn muaß
Ka Froge
Oba daunn, waunn a eahm imma
und imma wieda auskummt
und er von sein Berg wieda obe ins Toi
sein deppaten Fösn nochrenna muaß
daunn schauts eich an au!

Nix von Varzweiflung, kane Tränan, ka Zurn
Gaunz gaunz locka schaut eahm da Sisyphos noch
wir a obekollat und springt und hupft -
beilt aan zwa moi mitn wuchtign Schedl
pfeift drauf und si söba a Liadl
und steigt daunn locka und laungsaum
wida iban Haung obe
Er waas nemlich eh, daß arn wieda aufferolln muaß
und daß de gaunze Hockn eigentlich sinnlos iss
Oba er sicht darin a Training fir sein Kerpa -
Ärmen hot a eh scho wia a Freistühringa -
und jetzt beim Obegeh entspaunnt a si so richtig
schaut si de schenan Bluman au
huacht denan Vegln zu wias singan
und waas: i bin mei eigana Herr!
An de Götta glaubt a schon laung nimma mehr
Und da Felsbrockn, den a si unten wieda zsaummsuacht, is schon laung sei eigana
wia a Stickl von ehm söba
Ka Spur mehr von ana Strof oda Bestrofung
Jo eigentlich is a gaunz glicklich mit sein Lebn

Und waun ma si gaunz ehrlich san
so geht do a jeda von uns
waun a nur a bissl a Hirn hot
mitn söbn Gfüh jedn Tog in sei eigane Hockn
und imma wida, s´gaunze Leben laung

So sich i in Sisiphos eigentlich mein großn Brudan und ka fuachtbor orme Sau

Oba weus so wenich Intelligenzla untar uns gibt
deswegen gibt’s a so weniche glickliche Menschn!




Weitere Werke auf der Homepage des Autors:
www.schida.at

Impressum

Tag der Veröffentlichung: 02.01.2010

Alle Rechte vorbehalten